Gibutyag sa Revolutionary Guard Corps (IRGC) sa Iran nga andam nilang hatagan og “complete freedom and authority” ang mga nasod sa Arab ug Europe sa Strait of Hormuz kung papahawaon sa maong mga nasod ang mga ambassador sa Israel ug Estados Unidos.
Gipahibalo kini sa IRGC human sa pahayag ni U.S. President Donald Trump nga hapit na matapos ang giyera sa Gulf region tungod sa mga demonstrasyon nga may kalabutan sa pagtuboy sa bag-ong Supreme Leader sa Iran nga si Mojtaba Khamenei.
Sumala sa IRGC, dili nila tugotan ang pag-export sa lana gikan sa rehiyon kung magpadayon ang military actions sa Estados Unidos ug Israel.
Gidugang pa sa IRGC nga sila mismo ang magdesisyon kung kanus-a matapos ang gubat sa West Asia, ug dili ang Amerika.
Matud pa sa pahayag sa IRGC: “Kami ang magbuot sa katapusan sa gubat.”
Gidugang pa nila nga ang kahimtang ug kaugmaon sa rehiyon anaa na karon sa kamot sa ilahang armadong pwersa, ug dili ang mga pwersa sa Amerika ang makatapos sa gubat.
Ang Strait of Hormuz giila nga usa sa labing importante nga ruta sa pagluwas o pag-export sa petrolyo sa kalibutan, nga nagkonektar sa mga dagkong oil producers sa Gulf padulong sa Gulf of Oman ug Arabian Sea.
Samtang kabahin niini, misaka na sa $120 kada bariles ang presyo sa lana tungod sa 10 ka adlaw nga panagbangi sa US ug Israel batok sa Iran.
Naghatod usab kini og kabalaka sa internasyunal nga merkado sa enerhiya, diin miabot sa $119.50 matag drum ang presyo sa Brent crude.
Bisan og mikunhod kini ngadto sa $100 matag barrel kagahapong adlawa ( Martes), kapin 20% gihapon ang pagsaka sa presyo kung itandi sa panahon nga nagsugod ang gubat niadtong Pebrero 28.
Samtang, naglisod usab ang mga Gulf oil producers tungod sa mga oil sites nga nadaot sa miaging mga pag-atake sa Iran.
