DAVAO CITY – Nagpabilin sumala pa karon nga suspendido ang international flight sa Francisco Bangoy International Airport (Davao International Airport) hangtud sa katapusan sa Hulyo ning kasamtangan nga tuig.
Kini ang gibutyag ni Davao City Mayor Inday Sara Duterte-Carpio.
Sumala sa Mayor nga ang petsa sa pagpadayon sa international flights ang gisibog human ang nahimong meeting tali sa Civil Aviation Authority of the Philippines (Caap).
Nasayran nga Hunyo 22 ang orihinal nga scheduled date alang sa pagpadayon sa international flights. Pipila sa mga airline companies nga nagkansela sa ilang international flights ang gilangkuban sa Cebu Pacific, Cathay Pacific, ug Silk Air. Ang Cathay Pacific ang nag-operate sa ilang flight tali sa Hong Kong ug Davao City samtang ang Silk Air ug Cebu Pacific nag-operate ug flights tali sa Davao ug Singapore.
Una na sab nga gibutyag ni Caap-Davao airport manager Rex Obcena ang nahisgutan nga lakang sa mga airline companies apan wala na niini gibutyag pa ang rason kung nagkansela ang mga nahisgutan sa ilang operasyon.
