DAVAO CITY – Gipahibalo sa Bureau of Fire Protection (BFP) Region 11 nga nagpahigayon sila ug “internal cleansing” ug pangtangtangon ang mga corrupt nga opisyal.
Laraw niini nga sugdan nila ang maayo ug tukma nga binuhatan sulod sa BFP. Una ng mi-angkon si Sr. Supt. Wilberto Rico Neil A. Kwan Tiu, BFP-11 regional director, nga adunay korapsiyon sa ahensiya dili lamang dinhi sa rehiyon kung dili latas sa nasud.
Hinuon gipasalig sa opisyal nga gisubay na nila karon ang mga personahe nga nalambigit sa korapsiyon gumikan kay dili nila buot nga maguba ang imahe sa BFP.
Gihimo sa opisyala ang pahayag human nga pipila sa mga personahe ug opisyal sa BFP-Davao ang nag-atubang ug reklamo human ang nahitabong sunog sa NCCC Mall nga mikalas ug daghanang kinabuhi.
Kahinumduman nga lima ka mga BFP-Davao officials ang na-relieve sa katungdanan nga gilangkuban nila ni Honey Fritz Alagano, kanhi BFP-Davao fire marshal; Senior Fire Officer 1 Leo Lauzon, fire safety inspector sa SSI Office; Senior Fire Officer 2 Joel Quizmundo, fire safety inspector sa NCCC Mall; Senior Fire Officer 1 Roger Dumag, chief sa Fire Safety Section nign dakbayan; ug Inspector Renero Jimenez, station commander sa SIR Fire Station.
Hinuon dili pa mabutyag ni Kwan Tiu kung kalakip ang mga nahisgutan sa mga ireklamo sa Interagency Anti-Arson Task Force kini tungod wala pa silay nadawat nga kopya sa report nga gisumite sa DILG.
