Gibarugan ni Kristina Conti, assistant to counsel sa International Criminal Court (ICC), nga kinahanglan nga paminawon una ang tingog sa mga giingong biktima sa drug war ni kanhi Pangulong Rodrigo Duterte sa dili pa siya hatagan og interim release.
Kahinumduman nga nangayo ang kampo sa kanhi pangulo nga hatagan siya og temporaryo nga kagawasan, ug kon maaprobahan kini, siya temporaryong makagawas gikan sa detention facility sa ICC paingon sa usa ka wala giingong nasud nga andam sumala pa modawat kaniya.
Gikumpirma usab sa ICC prosecutor nga wala sila’y pagbabag sa hangyo sa kanhing presidente. Apan, giinsistir ni Atty. Conti nga ang perspektibo sa mga biktima susama ka-importante sa panan-aw sa depensa ug prosecution, busa dapat kini paminawon sa international tribunal.
Gikuwestiyon usab sa abogada ang pamahayag sa kampo sa depensa nga nakaistorya na kuno nila ang prosecution ug ang representante sa usa ka nasud nga andam modawat ni Duterte kung pagawason kini.
Sumala ni Conti, kinahanglan una nga kumpirmahon sa ICC ang maong mga pahayag tungod kay self-serving kini ug wala pay klarong ebidensiya kung tinuod ba gayud nga nahitabo ang mga pakighimamat.
Hangyo ni Conti nga hatagan og higayon ang mga biktima sa drug war nga iyang girepresentahan aron ipadayag ang ilang mga rason sa pagsupak sa maong interim release.
Bisan pa man niini, gitino ni Conti nga bisan pag mahatagan ang hangyo sa kampo ni Duterte, dili kini pasabot nga gawasnon na siya sa tanang aspeto, tungod magpabilin gihapon nga istrikto ang ICC sa iyang mga lihok, lakip na ang pakighinabi sa mga mamamahayag.
