DAVAO CITY – Giawhag sa Department of Information and Communication Technology kon DICT ang publiko nga mutabang sa gobyerno alang sa pagpatuman sa “sim card registration act”.
Sa eksklusibong pakighinabi sa Bombo Radyo Davao kang DICT Asst. Regional Director Engr. Erlito Tacontian, gikabutyag niini nga nangandam na ang ahensya alang sa implementation sa maong balaod.
Giklaro usab sa opisyal nga walay angay kabalak-an ang katawhan sa hisgutang seguridad sa impormasyon panahon nga ipatuman na ang sim card registration. Kini gumikan, dunay ahensya sa gobyerno nga maoy mopaseguro nga dili mabutang sa risgo ang data information sa mga Filipino.
Gipasalig usab sa opisyal ang kaandam sa nasud sa pagpatuman niining bag-ong balaod. Kinahanglan na matod pa kining maimplementar aron magukod ang mga nagapaluyo sa nihitik nga text scam ning kasamtangan.
Alayon niini maghiusa ang Public Telecommunication firms, National Telecommunication Commission, National Privacy Commission, Department of Information and Communication Technology ug Cybercrime Investigation and Coordinating Center nga maoy mahimong attached agencies alang sa pagpatuman sa Republic Act No. 11934.
