Gikanayon sa Philippine Statistics Authority (PSA) nga mikunhod ang inflation rate sa Pilipinas gikan sa 2.9% sa Enero, og nahulog kini sa 2.1% sa Pebrero. Ang paghinay sa pagsaka sa presyo gibasi sa mas ubos nga gasto sa pagkaon, utilities, ug transportasyon.
Mas ubos kini kung itandi sa forecast sa Bangko Sentral ng Pilipinas (BSP) nga 2.2% hangtod 3%, nagpasabot nga adunay igong luna ang BSP sa pagpadayon sa ilang easing cycle aron matabangan ang ekonomiya.
Samtang, ang food ug non-alcoholic beverages misaka lang og 0.8% tandi sa 2.4% sa miaging bulan.
Ingon man, ang gasto sa balay, tubig, kuryente, gas, ug uban pang suplay misaka lang og 1.7% gikan sa 2.4%, samtang ang transportasyon misaka lang og 0.2% gikan sa 1.7%.
Ang ubang sektor sama sa sinina, mga gamit sa balay, panglawas, ug serbisyo sa hotel ug restaurant nagpakita usab og mas hinay nga pagsaka sa presyo.
Kabahin niini, ang kasagaran nga presyo sa ubang sektor mihinay, ang alkohol ug tabako misaka og 4% gikan sa 3.9% sa Enero.
Bisan pa niini, ang kinatibuk-ang inflation rate nagpabilin sulod sa opisyal nga target range sa gobyerno, nga naghatag og positibong timailhan alang sa ekonomiya.
