Adunay pagasundong bag-ong rota ang mga contingents sa ipahigayong Indak-Indak sa Kadalanan 2022.
Kini mismo ang gikumpirma ni Harold Quibete, event organizer sa 37th Kadayawan Festival. Ang rota sa maong street dance competition ang magsugod sa Veterans Rotunda nga nahimutang sa C. Bangoy Street paingon sa Ramon Magsaysay Avenue hangtod sa Roxas Avenue kung asa mahitabo ang ilahang pinakauna nga performance. Alang sa ikaduhang performance, muagi ang mga partisipante sa CM Recto Street paingon sa Bonifacio Street corner Pelayo Street junction near Apo View Hotel.
Sa ikatulo ug ulahi nga rota,muagi kini sa San Pedro Street kung asa pagahimoon ang grand showdown sa San Pedro Square. Sumala sa Davao City Transport and Traffic Management Office head nga si Dionisio Abude, sirad-an usab ang mga dalan ug intersections alang sa street dance competition ingon man ang Pamulak sa Kadayawan float parade.
Aron masiguro ang seguridad sa mga mutan-aw ug mga performers tungod kay daghang mga tawo ang gilauman nga motambong sa kalihokan, anaa sa 3889 ka security personnel ang i-assign sa panahon sa Indak-Indak.
Nagpahinumdom usab si Public Safety and Security Command Center Head nga si Angel Sumagaysay sa mga manan-aw nga magbinantayon ug magpalayo sa ubang mga tawo tungod mao kana ang dako nga oportunidad alang sa mga pickpocketer o snatcher nga makapahigayon sa ilang dautan nga laraw.
