Gi-awhag ni Deputy Speaker Paolo Ortega V si Vice President Sara Duterte nga personal nga motambong sa gitakdang impeachment trial karong Hulyo 6 aron tubagon ang mga alegasyon nga gipasaka batok kaniya.
Sumala pa ni Ortega, bisan adunay iyang pagduda nga motambong ang Bise Presidente tungod sa mga nangaging higayon nga wala kini mitunga sa mga pagpaminaw sa Kongreso, ang impeachment trial mao ang hustong higayon aron ipatin-aw niini ang iyang baruganan ug tubagon ang mga isyu nga giatubang.
Dugang pa niini, giingon ni Ortega nga dugay nang nagpaabot ang publiko sa klarong tubag gikan kang VP Sara kabahin sa mga kontrobersiya nga nalambigit sa iyang ngalan.
Lakip sa iyang gipadayag, gipasiugda usab ni Ortega nga andam na ang House prosecution panel sa pagpresentar sa ilang mga ebidensya ug mga testigo sa pagsugod sa impeachment trial.
Sa kasamtangan, giatubang ni Vice President Sara Duterte ang upat ka Articles of Impeachment nga may kalabotan sa giingong dili husto nga paggamit sa P612.5 milyon nga confidential funds, dili mapatin-aw nga katigayonan, giingong panuhol, ug grave threats batok nila Pangulong Ferdinand Marcos Jr., First Lady Liza Araneta-Marcos, ug kanhi House Speaker Martin Romualdez.
Kahinumduman, gitakdang sugdan sa Senado ang impeachment trial batok sa Bise Presidente karong Lunes, Hulyo 6, diin gilauman nga sugdan ang pormal nga pagdungog sa mga kaso ug presentasyon sa mga ebidensya.
