Posibleng mahimong pinaka dugay nga impeachment trial sa kasaysayan sa Pilipinas ang pagtaral batok kang VP Sara Duterte, sumala kang Senate Secretary Renato Bantug. Base sa pagbana-bana sa impeachment clerk of court, mahimong moabot og pito ka bulan ang trial tungod kay tulo ka adlaw matag semana ang target nga schedule sa pagtaral. Sumala pa ni Bantug, ang pito ka bulan nga projection gibase sa 92 ka trial days nga gihangyo sa House Prosecution Panel ug 30 ka adlaw nga gihangyo sa Defense Panel aron maipresentar sa duha ka panig ang ilang mga ebidensiya ug mga testigo.
Gibutyag usab nga posible pang muboan ang proseso kung mas daghang mga witness ang mapresentar matag adlaw.Kung ikumpara sa nangaging impeachment trials, miabot lamang og 44 ka adlaw ang pagtaral kang kanhi Chief Justice Renato Corona kaniadtong tuig 2012. Samtang, ang impeachment trial batok kang kanhi Pangulong Joseph Estrada kaniadtong 2001 milungtad lamang og 23 ka adlaw human mi-walkout ang House Prosecution Panel tungod sa pagdumili kaniadto sa Senate Impeachment Court nga ablihan ang gitawag nga “second envelope.”
Ang maong insidente maoy nakapadasig sa ikaduhang EDSA People Power Revolution, nga misangpot sa pagkatangtang ni Estrada sa iyang katungdanan.Usa sa mga pangunang gipangandaman sa impeachment court karun mao ang taas nga trial, samtang kinahanglan usab nga mabalanse niini ang katungdanan isip lehislatura, lakip ang paghimo ug mga balaod, pagrepaso sa mga lagda, ug pagsusi sa gisugyot nga pondo alang sa umaabot nga tuig, gawas pa sa ubang importante nga buluhatong lehislatibo
