Dili kuno ang Senate Committee on Women, Children, Family Relations and Gender Equality ang magdesisyon kung guilty o dili si Pastor Apollo Quiboloy.
Kini ang nahimong tubag sa Kingdom of Jesus Christ leader sa mga akusasyon batok kaniya sa mga kanhi miyembro sa ilahang relihiyon.
Matod pa ni Quiboloy nga gikinahanglang pamatud-an sa mga victim-survivors sa korte ang ilahang mga akusasyon aron madepensahan niini ang iyang kaugalingon.
Gitawag pa sa pastor nga trial by publicity ang pag-imbestiga sa komite gumikan kay wala silay resource person sa pagdungog gumikan kay pulos sa mga nag-akusa sa iyaha ang mga gipagawas sa Senado.
Hugot usab niining gipanghimakak ang mga alegasyon sa iyaha susama sa sexual nga pagpangabuso ug uban pa nga walay kamatuoran.
Apan sa kabahin ni Sen. Risa Hontiveros, normal lamang sa giakusahan ang pagpanghimakak gumikan kay kini ang pamagi sa mga nahisgutan nga makalikay sa tulubagon sa balaod.
