Natapos na ang gihimong imbestigasyon sa Commission on Audit (COA) sa gikwestyong intelligence ug confidential funds sa buhatan ni Vice President Sara Duterte niadtong 2022 lakip na ang confidential funds sa Department of Education (DepEd), sa dihang kini ang nagdumala kaniadto sa nahisgutang departamento.
Kini ang gibutyag ni COA Chairman Gamaliel Cordova sa Kamara sa budget hearing sa Commission on Audit alang sa 2025 nga mubalor sa P13.4 billion.
Sa interpellation ni House Deputy Minority Leader France Castro, gipahayag ni Cordova nga mitubag na ang OVP ug DepEd sa kamando-an nga magsubmitar ug report kung paunsa gigamit ug gigasto ang intel ug confidential funds.
Nahilakip sa giimbestigahan sa COA ang P125 million confidential funds sa OVP niadtong 2022; P150 million confidential funds sa DepEd ug P500 million confidential funds sa OVP niadtong 2023.
Dugang pa sa opisyal nga gihatagan na nila ug kopya sa resulta sa ilahang imbestigasyon ang Office of the President, Senate President ug House Speaker.
Sa nahisgutang budget hearing, nag-mosyon ang House Deputy Minority Leader France Castro nga gumikan kay dili pwedeng isapubliko ang resulta sa imbestigasyon sa COA, ipa-subpoena sa kamara ang mga dokumento ug resulta sa COA investigation.
Samtang nag-request usab sa House Committee on Appropriations ang buhatan ni VP Sara nga ipahigayon ang petsa sa 2025 budget hearing sa Agusto 27 inay sa adlawng huwebes, Agusto 15 apan walay gipahayag mahitungod niini ang OVP.
