DAVAO CITY – Nakumpiska ang nasa 157 ka mga piraso sa kawayan nga anaa sa kapin P107,000; ug nasa P78,000 nga kanitdad sa mga ekipo, atol sa usa ka raid nga gilusad sa may South Namnam, Brgy. Marilog, Marilog District, Davao City.
Pinaagi sa hiniusang pwersa sa Office of the City Building Official, NBI, PNP, NCIP ug uban pang ahensya, gilusong ang maong area nga gikatahong dunay napundok nga mga kahoy.
Nasayran nga walay katugbang nga mga dokumento ang maong mga gipamutol nga kahoy sa Lauan ug tanguile, ug ilegal sab ang gitukod ang gambalay duol sa usa ka protected area sa mga indigenous peoples sa nahisgutang lawak.
Nakumpiska sab sa maong ilegal nga gambalay ang mini-sawmill nga gigamit sa pagpamutol sa mga kahoy. Nakapangalan ang mga kahoy ug kagamitan sa illegal logging nila Jerry M. Aldevera, John Jagonia ug Thomas Bautista.
Gikustodiya na ang mga kahoy sa CENRO Davao. Samtang gipasaka na ang City Prosecutor’s Office ug mga patong-patong nga kaso batok sa mga dinakpan, sama sa Republic Act 7161 kon Forestry Code of the Philippines, Republic Act 8371 kon Indigenous Peoples Rights Act, ug Presidential Decree 1096 kon National Building Code of the Philippines.
via || Bombo LJ Florendo
