Gitakda na sa International Criminal Court ang pormal nga iskedyul sa ikaduhang status conference sa kasong giatubang ni kanhi presidente Rodrigo Duterte kalabot sa alegasyon nga crimes against humanity nga may kalabutan sa iyang kampanya batok sa ilegal nga droga atol sa iyang administrasyon.
Base sa public order nga gipagawas sa ICC niadtong Huwebes, himuon ang maong status conference sa Hunyo 23, 2026 gikan alas-10:00 sa buntag hangtod alas-12:00 sa udto sa lokal nga oras sa korte. Sumala sa Trial Chamber III sa ICC, lima ka importanteng isyu ang pagahisgutan sa maong pagdungog. Lakip niini ang deadline sa pagsumite sa mga obserbasyon sa Expert Panel Report, pag-adopt sa protocol sa pagdumala sa confidential information, limitasyon sa gitas-on sa Prosecution Trial Brief, pagtakda sa sunod nga mga status conference human sa judicial recess, ug mga public statement nga himuon sa mga legal counsel.
Kahinumduman nga gihimo ang unang status conference niadtong Mayo 27, 2026 diin nakadesisyon ang korte nga gikinahanglan pa ang ikaduhang sesyon aron mas lawom nga mahisgutan ang mga proseso sa kaso. Isip kabahin sa pagpangandam, mihangyo ang korte niadtong Hunyo 12 nga magsumite og mga sugyot ang mga partido bahin sa mga butang nga angay hisgutan sa sunod nga hearing.
Apan sumala sa rekord, ang prosekusyon lamang ang nakapadala og rekomendasyon niadtong Hunyo 17 samtang ang depensa ug Registry nagpahibalo nga wala silay dugang nga isyu nga ipasaka. Bisan pa man nga abli alang sa publiko ang status conference, gipasabot sa ICC nga mahimo silang magpatuman og pribadong sesyon kon adunay sensitibong impormasyon nga mahimong maapektuhan ang proteksyon ug seguridad sa mga testigo.
Gikumpirma usab sa korte nga dili motambong si FPRRD sa maong pagdungog human niya i-waive ang iyang katungod sa personal nga pagtambong sa hearing.
