DAVAO CITY – Ginapangandaman na ang ikaduhang hugna sa mobile vaccination drive alang sa transportation sector sa amihanang bahin sa Dakbayan sa Davao nga magsugod na sunod semana.
Nakaplastar na ang mga lingkuranan og lamesa sa San Miguel Parish sa Panacan ning dakbayan, nga magsilbing vaccination venue sa maong dapit.
Langkuban sa Lasang, Sasa, Doña Pilar, ug Doña Asuncion ang masakop sa pagpamakuna.
Kapin 800 na usab nga mga sakop sa transport sector ang nakapre-register na niini.
Kasamtangang ginahulat sa City Transport and Traffic Management Office ang pag-abot sa alokasyon sa bakuna ayha sila magpadala og schedule sa vaccination.
Ginaplastar na usab ang usa pa ka mobile vaccination drive sa Toril District ning dakbayan. Kahinumduman nga gipahigayon ang mobile vaccination drive sa mga lagyong bahin sa dakbayan aron dili na muadto ang mga driver ug operator sa sentrong bahin sa siyudad aron lang magpabakuna.
Gumikan usab sa kalayo sa maong mga dapit ngadto sa sentro, aduna’y uban nga wala nakasalmot sa pagpabakuna didto sa Agro vaccination site.
Una nang nagmalampuson ang unang hugna sa pagpamakuna sa Calinan District sa milabayng semana, diin 924 ka public utility vehicle drivers ug operators ang nabakunahan na batok COVID-19.
