DAVAO CITY – Nagsaulog sa ikaduhang tuig sa Davao de Oro sa pagkab-ot sa insurgency-free declaration ang Kalinaw Southeastern Mindanao, usa ka organisasyon sa mga kanhi kadre ug miyembro sa CPP-NPA-NDFP.
Ang pasalig sa probinsya sa kalinaw, hustisya sa katilingban, ug pagmando sa balaod makita sa pagkab-ot niini nga milestone. Giila ang organisasyon sa provincial government sa Davao de Oro atol sa seremonyas nga nagtimaan sa ikaduhang anibersaryo sa insurgency-free nga deklarasyon sa probinsiya.
Sa kasaysayan, ang Davao de Oro maoy kuta sa komunistang insurhensiya sa Pilipinas, diin naglihok ang NPA sa pito ka prenteng gerilya sa kapin sa 130 ka barangay.
Ang pagkab-ot sa kalinaw naglakip sa pagbungkag niining mga natarang gerilya, pagpadali sa pagbalik sa kanhing mga rebelde sa balaod, ug paghatag gahum sa mga komunidad sa pagsulbad sa mga isyu pinaagi sa dili mapintas nga paagi. Makita ang epekto sa pagsukol sa insurhensya sa ekonomiya, diin mikunhod ang gidaghanon sa mga kabus nga pamilya sa Davao de Oro gikan sa 49,400 ka pamilya sa 2018 ngadto sa 41,200 ka pamilya sa 2021.
Apan, miila ang Kalinaw SEMR nga nagpadayon ang sukaranang mga hagit sama sa kawalay-kaangayan, ubos nga sweldo ug ang dili igo nga kita sa panimalay sa kadaghanan sa populasyon, nga nakatampo sa radikalisasyon ug pagpahimulos sa mga kabus.
Aron masustiner ang usa ka palibot nga walay insurhensiya, mahinungdanon ang paghatag ug gahum sa mga kanhing myembro sa CPP-NPA-NDFP ug mga komunidad kaniadto nga naapektuhan aron masiguro ang ilang malungtaron nga integrasyon sa katilingban.
Nag-awhag ang organisasyon sa mga miyembro niini, mga kaanib nga organisasyon, ang kagamhanang probinsiyal sa Davao de Oro, ang 10th Infantry Division, ang Eastern Mindanao Command sa Armed Forces of the Philippines, ug ang tanang stakeholders nga magpabiling mabinantayon sa paglawig sa mga komplikasyon sa peacebuilding.
