DAVAO CITY – Subling managtagbo sunod semana ang mga peace negotiator sa kagamhanan sa Pilipinas ug sa National Democratic Front tumong ug tuyo nga kapangandaman ang ika-upat nga hugna sa panaghinabing pangkalinaw karong Abril.
Nasayran gikan kang GRP-Negotiator Atty. Antonio Arrellano nga hisgotan atol sa ika-upat nga hugna sa peace talk mao ang pagmugna sa kasabotan alang sa Socio-Economic Reporm ingon man ang political ug constitutional reform.
Sensitibo sumala pa ang nahisgutan nga hisgotanan gumikan kay subayon niini ang ugat hinongdan sa rebelyon sa Pilipinas.
Kini ang hinongdan nga posibling madugay-dugayan pa ang maong hisgotanan.
Gilauman hinoon sa GRP peace panel ug sa CPP/NPA/NDFP nga mahuman ang ika-upat nga hugna sa panaghinabing pangkalinaw sulod sa unom ka bulan sugod karong bulan sa Abril gumikan kay duna na’y gi-andam nga draft ang matag panel.
Gitataw sab ni Arrellano nga kung ugaling moulbo ang kagubot tali sa mga sundalo ug mga NPA, samtang nagpadayon ang peace talks, dili kini makonsedera nga paglapas sa peace process hangtud nga wala pa’y namugna nga bilateral ceasefire.
