Gihinumdum sa mga dabawenyo ang ika-siyam nga anibersaryo sa Roxas Night Market bombing kagahapong adlawa.
Ang maong paghinumdum gitambugan ni Acting Mayor Baste Duterte ug ubang opisyal sa lokal nga panggamhanan sa syudad.
Lakip usab sa mitambong ang mga nahibiling kabanay sa mga biktima.
Kahinumdumang kaniadtong tuig 2016 usab sa susamang adlaw gikatahong mikalas og 14 ka mga kinabuhi ang nahitabong insidente. Samtang lain pang 70 ka mga indibidwal usab ang naangol sa maong pagpamomba.
Ang maong paghinumdum gisugdan sa pagmisa, diin mahuman niini nagsindi og kandila og naghatag og bulak ang mga kabanay sa mga biktima lakip na ang pipila ka mga opisyal.
Mitambong usab sa maong paghinumdum si Acting City Director Mannan C. Muarip.
Nasayran nga ang maong insidente nakahatag gyud og dakong trauma ug kahadlok sa mga biktima apan mao usab kini ang nagsilbing hinungdan sa mas hugot nga seguridad ning dakbayan sa Davao ug masdaghan pa nga police visibility sa karon.
Pagpasalig pa usab niini sa mga kabanay, anaa lamang kini alang ngadto kanila kun ugaling nga gusto usab sa mga kabanay nga makig-istorya.
Pagpadayag usab niini nga sulod sa pila ka tuig niining pagpanerbisyo, bisan unsa matud pa kalisod ang kinabuhi, nahuna hunaan niining duna pa gyud mga katawhan nga mas naglisod pa sama sa mga nahibiling mga kabanay sa maong insidente.
