Gihinumdom karong adlawa ang dakong panghitabo nga pagkahagsa sa Air Philippines flight 541 sa Camanlangan, Brgy. San Isidro, Island Garden City of Samal, Davao del Norte niadtong tuig 2000.
Sulod sa 25 ka tuig na ang nakalabay, nagpabilin nga lab-as sa panumduman sa mga residente sa nasampit nga lugar ang maong panghitabo diin kapin gatos ang nangamatay og wala naluwas samtang patugpa na unta ang eroplano sa Davao International Airport sa dihang nahagsa kini sa Samal Island.
Subay sa datos sa mga otoridad, anaa sa 124 ka mga pasahero ug 7 crew members ang sakay sa eroplano ug gikonsidera kini nga “Worst Air Tragedy” sa Philippine Aviation History.
Atong balikan ang nahitabo, niadtong Abril 19, 2000, ang Air Philippines Flight 541, usa ka domestic flight gikan sa Manila paingon sa Davao City, nahagsa sa Samal Island, Davao del Norte, samtang niabot na kini sa Francisco Bangoy International Airport. Ang eroplano, usa ka Boeing 737-2H4 nga adunay rehistrasyon nga RP-C3010, nagdala og 124 ka pasahero ug 7 ka crew members. Walay nakaluwas sa 131 ka tawo nga sakay niini.
Nasayran nga ang Flight 541 mibiya sa Manila mga alas 5:30 sa buntag. Sa dihang anaa na kini sa runway 05 sa Davao, nakit-an sa mga piloto nga adunay laing eroplano (Airbus A319 sa Philippine Airlines) nga wala pa makabiya sa runway. Gipahibalo sa piloto ang air traffic control (ATC) nga mag-missed approach ngadto kanila. Apan, sa ilahang pagsulay nga mubalik sa paglanding, ang eroplano misulod pag-usab sa mga panganod ug misulay og visual flight sa ubos nga altitude, inay nga mosaka ngadto sa 4,000 feet sumala sa standard missed approach procedure. Tungod niini, ang eroplano nakabangga sa usa ka lubi ug mga kahoy hinungdan sa pagkahagsa sa usa ka bukid nga bahin sa Barangay San Isidro. Tungod sa maong panghitabo, wala halos nabilin sa lawas sa eroplano gumikan sa pagkasunog
Subay sa gihimong imbestigasyon nga ang maong panghitabo resulta sa “controlled flight into terrain” nga ang eroplano nagpadayon sa normal nga operasyon apan nabangga sa mga tag-as nga punuan sa Kahoy ug Lubi tungod sa sayop nga desisyon sa altitude ug navigation. Ang kakulang sa instrument landing system (ILS) sa Davao airport niadtong panahona ug ang foggy kon (gabon) nga kahimtang sa panahon nakadugang sa kalisod sa mga piloto.
Kini nga aksidente ang nagpabilin nga labing alaot sa kasaysayan sa Philippine aviation.
