Padayon ang pagsaka sa ihap sa mga scam calls sa nasud base sa report sa anti-scam app Whoscall. Tungod niini, nagpahimangno karon ang Cybercrime Investigation and Coordinating Center sa publiko nga magbantay ug dili gilayon magpa-ilad sa maong modus.
Kahinumduman nga naduso na ang SIM Registration Act sa Pilipinas niadtong 2022 aron mapugngan ang nagkalain-laing klase sa scam. Apan, adunay mga grupo ug eksperto nga misupak niini, kay ilahang gituohan nga ang SIM card registration mahimong hulga sa personal data ug dili kini epektibo batok sa mga fraud schemes.
Subay sa datos nanguna gihapon ang text scams nga nakarehistro og 648,239 ka scam messages sa unang bahin sa tuig. Mas ubos kini kung itandi sa 1,143,268 ka scam messages nga natala sa susamang panahon niadtong miaging tuig. Misaka ang scam calls sa 225.17%, gikan sa 108,157 ngadto sa 351,699 ka tawag.
Tungod niini, nanawagan ang Cybercrime Investigation and Coordinating Center nga siguraduhon nga ang mga tawag ug text messages naggikan sa lehitimong sources aron dili mailad sa mga scammers.
