Nagpahimangno ang Department of Social Welfare and Development (DSWD) nga mahimong moabot sa kapin 1.4 milyong pamilyang Pilipino ang mahulog sa kakabos kung dili dayong molihok ang gobyerno aron masulbad ang epekto sa nagpadayon nga oil crisis tungod sa tensyon sa Tungang Sidlakan.
Sa pagdungog sa Senate Committee on PROTECT (Proactive Response and Oversight for Timely and Effective Crisis Strategy), mibutyag si Sec. Rex Gatchalian nga base sa mga simulation sa Philippine Institute for Development Studies ug Asian Development Bank, posible nga mosaka ang gidaghanon sa mga kabus sulod sa unang tulo ka bulan sa krisis hangtod Hulyo kung walay interbensyon dayon ang gobyerno.
Dugang pa niya, mas taas pa gani ang ilang internal nga estima kumpara sa unang gipahibalo nga numero.
Samtang, gibanabanaan nga labaw pa sa 400,000 ka mga kabalayan ang mahimong malakip sa “near-poor” category, sumala ni Sen.Sherwin Gatchalian, chairman sa Senate PROTECT Committee.
Gibutyag usab sa DSWD nga ilang target karon nga tabangan ang kapin 7.5 milyong kabalayan, lakip na ang mga benepisyaryo sa Pantawid Pamilyang Pilipino Program (4Ps), mga kabus nga household base sa Community-Based Monitoring System (CBMS), ug mga low-income ug minimum wage earners nga rehistrado sa Social Security System.
Gibanabanaan usab nga moabot sa P74 bilyon ang gikinahanglan aron masuportahan ang gitawag nga bottom 30% sa populasyon ug maibalik ang ilang nakunhuran nga kapasidad sa paggasto.
Giangkon usab sa DSWD ang presensya sa gitawag nga “aid fatigue,” apan gikabutyag nga importante gihapon ang tabang sa gobyerno aron malikayan ang mas grabe nga paghinay sa ekonomiya sa umaabot nga panahon.
