DAVAO CITY – Misaka ang ihap sa mga nakabsan sa kinabuhi sa nakalabayng pagdahil sa yuta niadtong Pebrero 8 sa Zone 1, Barangay Masara, Maco, Davao de Oro.
Subay sa datos nga gipagawas sa Provincial Disaster Risk Reduction and Management Office as of February 11, 7PM, miabot na sa 54 ka mga patayng lawas ang na-retrieve.
Samtang nagpabilin sa 63 ang na-missing, ug 32 ang mga gikatahong nangaangol.
Una nang gikataho sa Public Information Office sa Davao de Oro nga anaa sa 30 hangtod 50 metro ang gilawmon sa nagtapun-og sa yuta sa ground zero, samtang kadaghanan sa mga patayng lawas ang nakutkot sa gilawmon nga 40 hangtod 20 metros.
Gidala na ning kasamtangan sa incident command post ang mga patayng lawas aron ipailawom sa post-mortem examination.
Taliwala pa man sa pagsaka sa ihap sa mga nakabsan sa kinabuhi, naglaum ang PDRRMO sa probinsya nga ma-rescue ang daghanang survivors nga natanggong sa nahugno nga dapit.
Gikanayon ni Joseph Randy Loy, PDRRMO head, gikonsidera gihapon nila kining search, rescue, and retrieval gumikan sa daghanan pag mga kinabuhi nga kinahanglang luwason.
Una nang gikataho sa buhatan nga anaa sa 55 ka mga kabalayan ang nalubong sa maong dapit.
Gikanayon sab sa opisyal nga nagdepende gihapon ang chance of survival sa mga residente gumikan sa posibleng suplay sa hangin nga kon pockets ilawom mismo sa ground zero.
Giangkon sa lokal nga panggamhanan sa Davao de Oro nga taliwala pa man sa pagpatuman sa ‘no build zone’ sa Barangay Masara sa Maco, aduna gihapon mga residente nga nahimuyo sa maong dapit bisan pa man nga dunay mga abiso sa pagpapahawa sa mga residente sukad tuig 2008.
Una nang gikataho sa Mines and Geosciences Bureau 11 nga highly susceptible ang lugar sa mga flashfloods ug landslide ang maong barangay.
Gikatala pa ang duha ka nahitabong landslide niadtong Setyembre 2008 nga gikamatyan sa 24 katao.
Diha sab natala ang ubay-ubay nga mga pagtay-og sa yuta sa maong dapit. Duna na sab gimuntar nga relocation site ang panggamhanan alang sa mga residente sa New Bataan ug Nabunturan apan wala kini gitahud inay namalik pa sila sa karong ground zero na nga lugar.
Tungod niini, hingpit nang ipatuman sa Davao de Oro LGU ang implementasyon sa no-build zone policy sa mga delikadong lugar nga giidentipikar sa Project NOAH kon Nationwide Operational Assessment of Hazard.
Kahinumduman nga ilabihang natabunan niadtong Pebrero 7 sa gabii ang garahe sa bus, barangay hall, ug mga kabalayan sa may Zone 1, Barangay Masara.
