Misaka na sa 38 ka mga indibidwal ang kumpirmadong namatay tungod sa sagunson nga pagbaha, gumikan sa habagat, ug mga bagyong miigo sa nasud, subay kana sa labing bag-ong datos sa National Disaster Risk Reduction and Management Council (NDRRMC).
Gipahibalo usab nga mikabat na sa 33 ang ihap sa mga naangol o nasamdan, diin 24 niini ang validated na, samtang ang uban nagpaabot pa sa beripikasyon.
Subay sa susamang datos, walo ka mga tawo ang gikataho nga nawagtang ug padayon nga ginapangita sa mga otoridad hangtod karon.
Sa kasamtangang assessment, anaa sa kapin 8.5 milyon ka mga indibidwal o katugbang sa 2.3 milyong pamilya ang giilang grabeng naapektuhan sa mga bag-ong kalamidad.
Gikan niini, sa 24,771 ka pamilya o 91,006 ka indibidwal ang mihikling padulong ngadto sa 839 ka evacuation centers sa tibuok nasud, samtang 32,320 ka pamilya o 123,624 ka indibidwal ang nagpabilin sa gawas sa mga evacuation center apan ginahatagan gihapon og paunang tabang sa mga ahensya sa gobyerno.
