DAVAO CITY – Nagpadayon sa pagsaka ang ihap sa mga na-retrieve nga patayng lawas sa Barangay Masara, Maco, Davao de Oro.
Sumala sa pinakaulahing datos sa MDRRMO Maco, as of February 15, 7PM, anaa sa 92 ang na-retrieve nga patayng lawas; samtang 36 pa ka mga indibdwal ang na-missing.
Sumala ni Lea Añora, MDM cluster head, anaa sa 14 ang gilubong karon sa Maco public cemetery nga gilangkuban sa mga nakuha nga tibuok lawas ug mga putol nga bahin sa lawas gikan sa nakubkob sa ground zero.
Gipagawas na sa Maco LGU ang advisory mahitungod sa pagbalhin gikan sa Search, Rescue, and Retrieval ngadto sa Search and Retrieval Operations sa nahitabong landslide.
Gikaayon ni Engineer Ariel Capoy, lncident Commander, nagsugod na sukad Pebrero 14 ang Search and Retrieval Operations sa ground zero.
Sa pagkakaron, wala pa matino kon hangtod kanus-a ang nagpadayong operasyon apan nakasentro karon ang operasyon sa pagkuha sa daghanang ihap sa mga nangawala.
Samtang usa ka intefaith prayer ang gitanyag kagahapon ngadto sa ground zero alang sa mga biktima sa nahitabong landslide sa Barangay Masara.
Kini inubanan sa mga religious leaders sa Katoliko Romano, Mansaka ug Kagan tribe.
Gipaklaro sa DILG 11 nga dili mapapas sa mapa sa munisipalidad sa Maco ang Barangay Masara human sa ipahigayong relocation sa daghanang mga residente nga apektado sa nahitabong landslide niadtong Pebrero 6.
Sumala ni MDM Cluster Head Leah Añora nga nagpabilin gihapong usa ka komunidad ang Barangay Masara subay na sab sa legalidad niini.
Apan gikabutyag nga nakig-alayon ang ilang kapitan ngadto sa buhatan aron makakita og luwas nga lugar nga mamahimong kabalhinan sa mga residente sulod sa bisinidad sa Masara.
Pagasusihon sab kini sa Mines and Geoscience Bureau 11 diin kon maaprubahan, ipatuman dayon ang relocation sa dali nga panahon.
Una nang gideklara sa Mines and Geoscience Bureau 11 nga no bulid zone ang Barangay Masara sukad pa 2008.
Sa pikas bahin, gipaklaro sa mga hingtungdan nga temporary burial ang nahitabong paglubong sa 14 ka mga patayng lawas sa Maco Public Cemetery niadtong Pebrero 14.
Sumala pa sa Añora, giagi sa DNA samples ang mga gipanglubong nga mga bangkay, ug matag usa niini ang aduay case numbers nga dunay corresponding description kon pag-ila sa mga patayng lawas aron paspas sab ang pag-ila niini sa mga tagtungod nga nangita sa ilang mga nangawala nga kabanay.
Sa pikas bahin, gipasalig sa lokal nga panggamhanan nga matubag ang panginahanglan sa mga gipanghikling nga mga residente.
Subay sa datos MDRRMO Maco, anaa sa 1,497 ka pamilya katugbang sa 5,349 ka indibidwal ang nagpundo sa 12 ka mga evacuation centers sa Maco ug Mawab areas.
