Nagpahigayon og Iftar Program ang Davao City Police Office (DCPO) sa Masjid Adillah sa Landas Compound, Samuel Village, Toril, Davao City, isip kabahin sa paghatag og pagrespeto ug pakighiusa sa Muslim community sa panahon sa Ramadan.
Subay sa taho, gipangunahan ang kalihokan ni Mannan C. Muarip, Acting City Director sa DCPO, uban sa mga miyembro sa kapulisan aron makig-ambit sa komunidad sa maong espiritwal ug kultural nga selebrasyon.
Ang kalihokan mainiton nga gidawat ni Ustadh Yaser Landas, Imaam sa Masjid, uban ni Datu Yunos Landas ug uban pang respetadong miyembro sa komunidad, nga nagpakita sa lig-on nga relasyon tali sa kapulisan ug sa lokal nga komunidad.
Dugang pa niini, nahimong posible ang maong inisyatibo pinaagi sa suporta sa Mercy Islamic Foundation nga gipangulohan ni Sheikh Mohammad Habeeb Al-Kholaqi, nga maoy nag-sponsor sa 100 ka Iftar meals alang sa Muslim nga komunidad sa lugar.
Sumala sa DCPO, pinaagi sa yano apan makahuluganon nga pag-ambit sa Iftar meal, napalig-on ang panaghiusa, respeto, ug kooperasyon tali sa kapulisan ug sa komunidad nga ilang gialagaran.
Lakip usab sa tumong sa kalihokan ang pagpalambo sa pagsinabtanay ug pagtinabangay sa pagmintinar sa kalinaw ug kahapsay sa dakbayan.
Ang maong aktibidad gipahigayon ubos sa Oplan Amanah sa DCPO, nga nagtinguha sa pagpalig-on sa pagsalig, panaghiusa, ug pakigtambayayong sa Muslim community alang sa pagpreserba sa kalinaw, kahapsay, ug seguridad sa Davao City.
Dugang pa sa DCPO, gilauman nga ang ingon niini nga mga inisyatibo magpadayon sa pagpalig-on sa panaghiusa sa nagkalain-laing sektor sa komunidad.
