DAVAO CITY – Nanawagan karon og pagtagad sa mga dagkong kompanya nga giilang nag-unang polluters sa mga kasubaan sa Davao ang Davao-based environmental group nga Interfacing Development Interventions for Sustainability kon IDIS.
Kini human sila makahakot ug kapin 3,700 ka mga nagkadaiyang matang sa basura sa ilang gipahigayong mga clean-up drive niadtong Agosto ug karong bulan sa Setyembre sa Panigan River sa Barangay Tawan-Tawan, Lower Tamugan River sa Barangay Gumalang, ug Davao River sa Barangay San Rafael ning Dakbayan.
Gilangkuban kini sa mga food packaging, plastic bags, PET ug glass bottles, toiletries, sachets, medical wastes, ug uban pang household wastes.
Gikanayong Food wrappers ang kadaghanan sa ilang nakuha nga mukabat sa 41 percent, samtang ang mga cellophane ug sako ang ikaduhang pinakadaghan nga anaa sa 15 percent.Mga sachet sa sabon ug shampoo ang ikatulo sa pinakadaghan nga anaa sa 13 percent, ug nisunod usab ang mga plastic ug glass bottles ug mga container nga anaa sa 11 percent.
Dugay nang nagpahimangno ang grupo sa katawhan ug sa lokal nga panggamhanan nga tabangan ang kinaiyahan pinaagi sa tarong nga disposal sa mga basura, ilabi na sa pagpanalipod sa Panigan-Tamugan watershed, nga musunod nga water source sa Dakbayan sa Davao sa umaabot nga panahon.
Nagbahad usab sila kaniadto nga adunay mahitabong krisis sa limpyong tubig kung magpadayon ang improper waste disposal sa katawhan.
