DAVAO CITY – Nagpadayag og kadismaya ang Interfacing Development Intervention for Sustainability kon IDIS sa kadaghan sa mga basura nga gipang-anod sa halapad nga pagbaha sa pipila ka dapit sa Davao City niadtong Lunes sa gabii.
Gikaalarma usab nila ang maong panghitabo sanglit dako gihapon ang posibilidad nga masubli kini ining mubunok na usab ang kusog nga pag-ulan.
Ila usab gipadayag nga daghan pa ang kinahanglan buhaton sa lokal nga panggamhanan aron matubag ang kanunay nang suliran sa waste ug flood management sa Dakbayan.
Nanawagan ang IDIS ngadto sa Davao City LGU nga paspasan na ang implementasyon sa Single-Use Plastic Ordinance ug paghugot sa monitoring ug compliance sa Ecological Solid Waste Management Act.
Nagsugyot usab sila nga istriktong ipatuman sa lokal nga panggamhanan ang Local Zoning Ordinance aron mababagan ang mga residential development sa mga giilang Floodway Mitigation Zones.
Kinahanglan usab magmuntar og sustainable nga drainage plan ang Davao City LGU matud nila. Subli usab silang nanawagan sa pagpanalipod sa kinaiyahan pinaagi sa maayong waste management, pagpadaghan sa urban greenery ug pagpatuman og nature-based solutions sa tanang development projects sa Dakbayan.
