Gibantayan ug gisusi sa Department of Public Works and Highways (DPWH) ug Independent Commission for Infrastructure (ICI) ang mga flood control projects sa Davao City human sa reklamo sa mga residente bahin sa peligro sa pagbaha ug kadaut sa mga dike.
Gipangulohan ni DPWH Undersecretary Arthur Bisnar Jr. ug ICI Special Adviser Gen. Rodolfo Azurin Jr., Nobyembre 5, misuroy ang grupo sa District 3 aron tan-awon ang kahimtang sa mga slope protection ug flood mitigation projects ilalom sa DPWH Region XI.
Usa sa gi-prioritize mao ang Matina Gravahan Flood Control Project, diin napakyas ang lima ka metros nga bahin sa dike sukad sa kusog nga baha niadtong Pebrero 2024.
Matud sa mga residente, kini usa ka peligro labi na sa ting-uwan, kay ang tubig sa Davao River dali ra mosaka ug makasulod sa ilang mga balay.
Tulo na ka tawo ang nahulog sa bungbong, usa ka hamtong ug duha ka bata, apan swerte nga walay namatay.
Sumala sa DPWH Region XI spokesperson Dean Ortiz, andam unta ang kontraktor sa pag-ayo sa dike, apan napugos nga mohunong tungod sa right-of-way dispute.
Ang tag-iya sa yuta tapad sa dike nagbabag sa mga trabahante nga mosulod aron makatrabaho. Hangtod karon, naghulat pa gihapon ang kontraktor sa permiso aron masugdan ang repair.
Gibisita usab sa grupo ang slope protection ug road projects sa Calinan District ug uban pang kritikal nga lugar aron masiguro nga lig-on ang mga istruktura batok sa landslide ug rockfall.
Tumong sa inspeksyon nga mapalig-on ang koordinasyon ug transparency tali sa DPWH, ICI, ug lokal nga panggamhanan.
Gipasabot sa DPWH nga prioridad nila nga mahatagan og tukmang repair schedule ang Matina Gravahan ug uban pang delikadong dapit, aron maprotektahan ang mga balay, establisyemento, ug kinabuhi sa mga Dabawenyo sa umaabot nga ting-ulan.
