Gisibak sa puwesto si International Criminal Court o ICC Prosecutor Karim Khan human uyonan sa kadaghanan sa mga miyembrong nasod sa korte ang iyang pagtangtang tungod sa mga alegasyon sa sexual misconduct nga may kalabotan sa usa ka junior staff member sa maong institusyon. Sumala pa sa report sa Reuters, 82 gikan sa 125 ka miyembrong estado sa ICC ang misuporta sa desisyon nga tangtangon si Khan sa iyang katungdanan.
Dugang pa niini, hugot nga gilimod ni Khan ang mga alegasyon batok kaniya, samtang giinsistir sa iyang mga abogado nga walay igo nga ebidensya nga mosuporta sa mga pasangil ug giingong wala usab mahimong patas ang proseso sa pagdungog sa kaso. Lakip sa sunod nga lakang sa ICC ang pagsugod sa pagpangita og bag-ong prosecutor aron mopuli kang Khan, apan gilauman nga sa sunod pa nga tuig mapili ang bag-ong mangulo sa opisina sa piskal sa korte.
Kahinumduman nga nagpabilin nga epektibo ang tanang arrest warrant nga gipagula sa ICC tungod kay ang mga huwes lamang sa korte ang adunay gahum sa pag-usab o pagbawi niini. Sa kasamtangan, gipadayon sa Estados Unidos ang pagsupak niini sa ICC. Matod ni U.S. Secretary of State Marco Rubio atol sa iyang pagbisita sa Pilipinas, dili motugot ang Washington nga ang mga opisyal sa Amerika moatubang og pagtaral sa maong korte.
Dugang pa niini, dili miyembro sa ICC ang Estados Unidos ug dugay ng gikuwestyon ang hurisdiksyon ug awtoridad sa maong internasyonal nga institusyon.
