DAVAO CITY – Padayon karon nga gikondena sa Integrated Bar of the Philippines (IBP)-Davao City chapter ang pagpatay sa abogado nga si Sitti Gilda Mahinay-Sapie ug bana niini nga si husband Muhaimin gawas sa ilang pinuy-anan sa Solariega, subdivision sa Barangay Talomo ug gitawag kini nga “derogation of the rule of law.”
Gikondena na sa mga grupo sa baogado ang pagpatay sa mga biktima ug gi-awhag ang kapulisan ug uban pang enforcement agencies nga imbestigahan ang krimen ug dad-on ang hustisya batok sa responsable sa krimen.
Nanawagan sab ang grupo nga panalipdan ang katawhan ug siguruhon ang kaluwasan sa mga abogado aron nga mahimo nila ang ilang trabaho nga walay kahadlok, harassment, ingon man bahad sa ilang kinabuhi.
Una ng gibutyag ni Col. Kirby Kraft, director sa Davao City Police Office (DCPO) nga padayon pa nila nga karon nga giimbestigahan ang mga posibleng suspek nga mipaluyo sa krimen ug wala na sab mihatag pa ug dugang impormasyon ang opisyal gumikan kay nagpadayon pa ang ilang imbestigasyon.
Usa sa gitutukan karon sa otoridad ang “personal grudge” ingon man ang kaso nga gihuptan sa mga nahisgutan may kalabutan sa land disputes.
