DAVAO CITY – Hustisya ang gisinggit karon ni Mercy Gulay ang asawa sa namatay nga si Jerry Gulay usa ka taxi driver nga taga dakbayan sa Davao nga nakaplagan na lamang nga walay kinabuhi didto sa Kabacan sa Cotabato.
Kahinumduman nga adunay mipakyaw sa biktima aron magpahatud sa Cotabato gikan sa Davao International Airport apan wala na matud pa kini nakauli sa iyang pamilya hangtud nga nasayran na lamang nila nga brutal nga gipatay si Jerry.
Matud pa kang Mercy, naglisud siya kung unsaon pagpasabot sa iyang anak nga wala na ang ilang amahan.
Subay sa pagsaysay ni Mercy, kaniadtong Marso 25 sa alas singko sa hapon mibiyahe paingon kabacan ang iyang bana human nga aduna sumala pay usa ka babaye gikan sa airport ang nagpahatud kang Jerry.
Nagduda sumala pa ang mga kaubanan sa bikitma nga mga taxi driver gumikan kay dili matud pa mosugot ang maong pasahero nga adunay mokuyog kanila.
Gikanayong gimonitor sa iyang mga kaubanan ang biyahe sa biktima gumikan kay ila pa kining na-contact pasado alas otso sa gabii dihang nakaabot kini sa Kabacan apan pagka-alas onse sa gabii, igo na lamang nga mo ring ang cellphone ni Jerry ug dili na kini tubagon hinungdan nga nagpa-blotter na lamang si Mercy ngadto sa otoridad.
Nagproblema karon si Mercy kung paunsa nila malubong si Jerry kini human nga wala sumala pa siyay salapi nga ikagasto.
Nasayran nga ang iyang bana lamang sab ang gisaligan sa pagpalit ug medisina sa inahan niini.
Sunod-sunod nga pahayag ni Mercy Gulay ang asawa sa gipatay nga Taxi driver nga si Jerry Gulay.
Dugang imbestigasyon ang gilusad karon sa kapulisan sa Pikit North Cotabato kini human nasayran nga nawala ang pitaka sa biktima ingon man ang manobela sa taxi nga gimaneho niini.
