Gihatagan sa International Criminal Court (ICC) Pre-Trial Chamber I ang kampo sa prosekusyon og deadline hangtod Hulyo 1 aron ipagawas ang mga ebidensyang gamiton sa confirmation hearing sa Setyembre 23, 2025, batok kang kanhi Pang. Rodrigo Duterte sa kaso nga “crimes against humanity”.
Ang maong mando gipirmahan nila Presiding Judge Iulia Antoanella Motoc, Judge Reine Adélaïde Sophie Alapini-Gansou, ug Judge María del Socorro Flores Liera. Ang susamang mando naglangkob usab sa iskedyul sa mga kalihukan nga pangandam sa umaabot nga hearing.
Kahinumduman nag-atubang ang kanhing Pangulo og kaso nga krimen batok sa katawhan, ilabi na sa pagpamatay tungod sa iyahang dugay nang kampanya batok sa mga drug user ug drug dealer, nga gibutyag sa mga human rights groups nga nakapatay og libuan ka mga tawo.
Gidakop siya niadtong Marso 11 ug gidala padulong sa ICC sa Netherlands sa susamang adlaw.
Sa aplikasyon sa prosekusyon alang sa iyang pagdakop, gibutyag nga ang mga krimen sumala pa ni Duterte ang kabahin sa usa ka “lapad ug sistematikong pag-atake batok sa sibilyan nga populasyon sa Pilipinas”.
“Posibleng napulo ka libo o labaw pa ang mga gipamatay,” matod sa prosekusyon kabahin sa kampanyang perming mitarget ang mga kabus nga kalalakin-an, bisan pa wala’y klarong ebidensya nga nalambigit kini sa iligal nga droga.
Subay sa ilahang kamanduan, gibutyag sa chamber nga ang Prosecution nagtumong nga humanon ang pagrepaso ug pagpagawas sa tanang ebidensya sulod sa ilahang posisyon nga dili molapas sa trayenta (30) ka adlaw sa wala pa ang confirmation hearing.
Gihangyo usab sa chamber nga isumite sa prosekusyon ang mga ngalan sa ilahang mga testigo nga ipresentar sa hearing, lakip ang summary sa ilahang testimonya.
Gipangayo usab sa chamber nga ipasa ang pre-confirmation brief (PCB) nga tapad sa Document Containing the Charges (DCC), aron ipresentar ang factual ug legal nga argumento nga nagsuporta sa mga pasangil, lakip ang ebidensyang ilahang gisandigan.
