DAVAO CITY – Ipahigayon na karong hapon ang pagpanumpa ni Davao City Mayor – elect Sebastian baste Duterte.
Himuon ang oath-taking ceremony ni Mayor Baste pasado alas dos karong hapon sa City hall grounds.
Apan ayha pa man niini, manumpa si Mayor Baste kang Judge Loida Posadas-Kahulugan sa Sangguniang Panlungsod session hall alas 2:55 sa hapon ug pagka-human moadto kini gawas sa City Hall Building alang sa iyang inaugural speech.
Samtang, gibutyag ni PMaj. Maria Teresita Gaspan, tigpamaba sa Davao City Police Office (DCPO), ipahimutang ang entry point sa San Pedro Street ug ipa-ilalom sa hugot nga inspection ang mga tawo nga molantaw sa maong kalihukan.
Dugang pa ni Gaspan, sa gihapon, tulo ka layer sa security ang ipatuman sa DCPO nga langkuban sa inner layer security nga mo-cover sa actual event diin matigayon ang oath-taking, ang middle layer diin ipahimutang ang mga police officers ug uban pang security counterparts ug ang outer layer nga langkuban sa mga modumala sa dagan sa trapiko ug mopahigayon og mga checkpoints.
Gawasnon sumala pa ang katawhan nga mogawas-sulod sa area sa city hall apan kinahanglan nga ang matag usa ang muagi sa hugot nga inspection ayha makasulod.
Muabot sumala pa sa 2,309 ka security personnel ang mohatag og hugot nga seguridad atol sa pagpanumpa ni Mayor Baste.
Kini ang gilangkuban sa security cluster gikan sa Davao City Police Office, City Government of Davao, Davao City Public Safety and Security Command Center, Central 911, Task Force Davao ug Philippine Army.
Via || Angie Chagas
