DAVAO CITY – Gipasaka na sa unang pagbasa ang laraw nga ordinansa sa usa ka konsehal sa Davao City nga magpahamtak og silot sa mga prank callers sa emergency hotline nga 911.
Gikanayon ni Committee on Peace and Public Safety chairwoman ug Davao City 1st District Councilor Luna Acosta, kinahanglang masilotan ang mga nang-abuso sa katungod nga makapangayo ug tabang sa mga emergency team sa dakbayan panahon sa bisan unsang emerhensiya.
Sumala pa sa datos nga gipagula sa Davao Central 911, anaa sa dul-ang 350,000 ang ilang mga nadawat nga tawag apan nasa 48,816 o 12% lamang ang natalang tunuod nga emergency calls.
Ang 60% sa mga tawag, gikonsiderang prank o nuisance call.
Dugang pa ni Acosta, makalangay sa pagpanerbisyo sa emergency team ang mga mutawag sa hotline nga walay tumong ug makababag sab kini sa ilang pagresponde sa tinuod nga emergency situations.
Buot ipatuman ang maong ordinansa uban sa tabang sa mga telcom companies ug National Telecommunications Commission.
Kabahin sa maong probisyon nga ibutang sa blocklist ang mga numero nga nagagikan ang mga prank ug nuisance calls aron dili na kini maka-access sa emergency hotline.
via || Bombo LJF
