DAVAO CITY – Gibutyag ni Covid-19 Task Force spokesperson Dr. Michelle Schlosser nga wala pa karon gikonsidera sa dakbayan ang pagpahigayon ug house-to-house vaccination bisan nga malampuson ang ginapahigayon karon nga vaccination program sa lokal nga kagamhanan.
Sumala pa kang Schlosser imposible kini nga mapatuman sa kasamtangan gumikan kay gawas nga kulang pa ang supply sa bakuna, kulang sab ang ilang team o mga sakop nga mohimo niini.
Bisan nga maayo ang maong lakang sa mga beneficiaries, mamahimong “time-consuming” kini sa ilang bahin sanglit dili gilayon nila maangkon ang daily target nga 15,000 vaccinees matag adlaw.
Gikanayong usik sab kini ug oras gumikan kay kinahanglan sab nga maghulat ug 30 minutos sa matag mabakunahan nga indibidwal aron nga sayrun kung aduna kini reaksiyon.
Hinuon aduna sumala pay uban nga mga local government units sa nasud ang nagapahigayon na ug house-to-house vaccination, ilabi na alang sa mga bedridden senior citizens o kadtong adunay comorbidities.
Samtang nagpadayon sab karon ang mobile vaccination sa siyudad kini aron nga dili na malisdan pa ang pipila ka mga residente nga moadto sa downtown area aron lamang magpabakuna.
Una na sba nga gibutyag sa opisyal nga nangandam na karon ang siyudad sa drive-thru vaccination sa Davao Crocodile Park nga usa pa gihapon sa mga pamaagi aron nga mapalapdan pa ang pagbaluna sa dakbayan ug daling maangkon ang 1.2 million herd immunity ayha ang Nobyembre ning kasamtangan nga tuig.
Kahinumduman nga gi-andam na sab karon sa siyudad ang guidelines alang sa incentives sa mga indibidwal nga gibakunahan ug first dose.
