Gipresenta sa House prosecution team ang mga opisyal sa Philippine Statistics Authority o PSA isip mga testigo sa impeachment trial batok kang Vice President Sara Duterte, sumala ni House Prosecutor Terry Ridon.
Sumala pa, tumong sa prosecution nga mapamatud-an ang alegasyon nga “fictitious” o hinimo lamang ang pipila ka indibidwal nga giingong nakadawat sa confidential funds sa Office of the Vice President o OVP.
Lakip sa mga testigo ang mga opisyal sa PSA nga maoy nagpahigayon og pagtuon ug mipadayag sa mga resulta niini atol sa House inquiry.
Gipahayag ni Ridon nga base sa maong pagsusi, wala makita sa mga rekord sa PSA ang mga ngalan nga makita sa mga acknowledgement receipt, lakip na si Mary Grace Piattos ug Milky Secuya, nga giingong wala matawo, naminyo o namatay sa Pilipinas.
Dugang pa niini, giingon sa mambabalaud nga pinaagi sa testimonya sa mga opisyal sa PSA, tinguha sa prosecution nga ipakita nga peke o hinimo lamang ang maong mga indibidwal, nga mahimong magpakita sa giingong sayop nga paggamit sa pondo sa gobyerno.
Sa laing bahin, una nang mipahayag ang kampo sa bise presidente niadtong Pebrero nga andam silang ipasabot ang paggamit sa mga “alias” alang sa confidential funds, lakip ang ngalan nga “Mary Grace Piattos.”
Sa pagkakaron, nagpadayon ang pagpresentar sa mga testigo ug ebidensiya sa House prosecution team atol sa impeachment trial.
