Gilimod ni House Prosecutor Terry Ridon ang pasangil sa depensa ni Vice President Sara Duterte nga nagsalig lamang ang prosecution panel sa mga pribadong abogado sa pagdumala sa impeachment case batok sa Bise Presidente. Sumala pa ni Ridon, aktibo ug direktang nalambigit ang mga public prosecutor sa tanang bahin sa pre-trial conference aron masiguro ang hapsay ug paspas nga pagdagan sa proseso.
Dugang pa niini, mitumaw ang maong isyu human sa giingong pahayag ni defense lawyer Atty. Mark Vinluan nga ang mga public prosecutor motambong lamang sa buntag ug dayon mobiya, samtang ang mga private prosecutor maoy mopadayon sa trabaho sa nahibiling bahin sa proceedings.Lakip sa iyang pagpasabot, gipahayag ni Ridon nga sulod sa tulo ka adlaw nga pre-trial conference, nagpabilin kini ug ang ubang miyembro sa prosecution panel hangtod sa pagtapos sa matag sesyon.
Gipatin-aw usab niya nga dili kakulang sa manpower ang hinungdan sa paghinay sa proseso, kondili ang kadaghan sa mga dokumento ug ebidensyang kinahanglan susihon, markahan, ug pirmahan sa duha ka kampo.Sa kasamtangan, nagpadayon ang pagmarka sa mga documentary evidence nga ipasa sa prosecution ug depensa, diin sumala pa sa House prosecution, mga 50 porsyento na sa maong proseso ang nahuman sukad nagsugod ang pre-trial conference.
Kahinumduman nga ang pre-trial conference maoy usa sa mga unang lakang sa impeachment proceedings aron maandam ang presentasyon sa mga ebidensya ug argumento sa duha ka kampo sa dili pa ang pormal nga pagsugod sa trial.
