Gipasiugda pag-usab sa House prosecution panel nga ang giingong pahayag ni Vice President Sara Duterte Kabahin sa pagkuha og usa ka “hitman” batok kang Pangulong Ferdinand Marcos Jr. mahimong ilahon isip betrayal of public trust. Sumala ni House trial spokesperson o Lanao del Sur Representative Zia Alonto Adiong sa usa ka interbyu kaniadtong Miyerkules Hulyo 9, 2026 nga seryoso ang maong isyu tungod kay gilauman nga ang usa ka taas nga opisyal sa gobyerno magpasiugda sa balaod ug dili magtinguha sa pagkuha og hustisya sa kaugalingong kamot.
Matod pa ni Adiong, kung tinuod nga nahibaw-an ni Duterte ang giingong pagbaton og hitman, angay unta kini nga i-report sa mga awtoridad imbes nga makigkoordinar niini.Gipagawas sa prosecution panel ang maong pahayag human nila ipresentar ang mga ebidensiya sa Senate impeachment court may kalabotan sa Article IV sa Articles of Impeachment, nga nagtumong sa giingong mga pagpanghulga sa Bise Presidente.
Gipresentar sa prosecution isip kabahin sa ilang ebidensiya si National Bureau of Investigation Senior Agent John Mark Calilung, nga mitestigo sa pagka-authentic sa online media briefing ni VP niadtong Nobyembre 23, 2024.Dugang pa ni Adiong nga tumong sa prosecution nga mapamatud-an dili lamang ang pagkatinuod sa mga video, kondili ipakita usab nganong giisip nga isyu sa nasudnong seguridad ang giingong pagpanghulga sa Bise Presidente.
