Gipunting sa House Prosecution panel ang duha ka trial day nga wala nadayon tungod sa kalamidad aron balikan ug susihon ang mga ebidensiya, testimonya ug uban pang impormasyon nga ilang hawiran batok kang Vice President Sara Duterte.
Matod kang panel adviser ug kanhi Representative Ace Barbers, wala mahimong babag ang kalamidad sa padayong pagtuon sa panel sa kaso batok sa Bise Presidente.
Dugang pa niya, nakahatag kini og duha ka dugang nga adlaw sa mga prosecutor aron masuta ang ilang mga argumento ug maandam ang mga sunod nga testigo ug ebidensiya nga ipresentar sa impeachment trial.
Sumala kang Barbers, bisan pa og wala magamit ang duha ka trial day, nagpabiling produktibo ang panel sa pagpalig-on sa ilang kaso.
Samtang, gihisgutan usab sa House ang posibilidad nga dugangan og usa ka adlaw ang kasamtangang tulo ka adlaw kada semana nga trial schedule, diin posibleng himoon ang Biyernes isip dugang nga trial day.
Nagtuo si Barbers nga makatabang kini aron mas mapaspas ang pag-uswag sa impeachment proceedings, bisan pa og dugang kini nga trabaho alang sa Senado ug House.
Sa pagkakaron, gipunting sa House panel ang Article 1 nga may kalabotan sa confidential funds ni VP Sara, diin gilauman ni Barbers nga mahimong mas init ug mas daghan pa og ebidensiyang mogawas sa sunod nga mga hearing.
Gilauman usab sa panel nga uyonan sa Impeachment Court ang ilang hangyo nga ideklarang hostile witness si Edward Fajarda, nga maoy sunod nga ipresentar human kang Gina Acosta.
Pareho silang mga special disbursing officer nga nalambigit sa duha ka opisina ubos kang Vice President Sara Duterte.
