Gideklara sa House Committee on Justice nga adunay igo nga basehanan ang duha ka impeachment complaints batok kang Bise Presidente Sara Duterte-Carpio, nga mag-abri sa dalan alang sa pagsugod sa pormal nga pagdungog sa sunod semana.
Sumala sa House panel, walay diretsong natubag ni VP Sara sa mga alegasyon batok kaniya sa iyahang gi-file nga “Answer Ad Cautelam”, nga iyang tubag sa mga reklamo.
Ang duha ka impeachment complaints ang naglangkob og seryosong pasangil sama sa betrayal of public trust, culpable violation of the Constitution, ug uban pa.
Nalambigit kini sa giingong sayop nga paggamit sa P612.5 milyon nga confidential funds ug ang alegasyong paghulga sa kinabuhi ni Pangulong Ferdinand Marcos Jr. ug sa iyang pamilya.
Sumala kang House Deputy Minority Leader Leila de Lima, ang tubag sa Bise Presidente wala mohaom sa mga isyu.
Wala usab, matud pa niya, klarong tubag kabahin sa malversation sa pondo, anomalous disbursements, ug sa mga sobre nga giingong gipanghatag sa pipila ka opisyal sa Department of Education.
Tungod niini, mahimo nang ipadayon sa komite ang impeachment hearing proper, diin susihon ang mga ebidensya ug testimonya sa duha ka bahin—ang complainants ug si VP Sara.
Sa dili pa ang panagboto, gipaklaro ni House justice panel chair ug Batangas 2nd District Rep. Gerville Luistro nga bug-at ang mga alegasyon ug nagkinahanglan og klaro ug konkretong tubag.
Dugang pa niya, magsugod ang pormal nga pagdungog karong Marso 25, 2026.{ VC-Luistro}. Ang tipik sa pamahayag ni Batangas 2nd District Rep. Gerville Luistro.
