DAVAO CITY – Natukod na ang tulo ka mga fully air-conditioned temporary hospital tents nga gamiton alang sa mga gipanghikling nga mga pasyente gikan sa Davao de Oro Provincial Hospital – Montevista nga ilabihang nadaot gumikan sa magnitude 6.1 nga linog kaniadtong Pebrero 1.
Pinaagi sa inisyatibo sa Philippine Red Cross ug Davao de Oro Provincial Disaster Risk Reduction and Management Office, nabalhin na ang 90 ka mga mga pasyente nga unang gihikiling gikan sa Montevista Sports Complex atol sa linog, samtang nagpadayon gihapon ang structural intensity assessment sa ospital.
Matud pa ni Governor Dorothy Gonzaga nga dagkong tabang ang maong mga make-shift hospitals alang sa nagpadayong paghatag og tabang medikal sa mga pasyente.
Aduna’y 14 ka higdaanan ang matag tent nga kaya malukop ang maong ihap sa mga apektadong pasyente. Limitado gihapon ang ipa-admit sa maong ospitakl gumikan sa mga nasutang pagkaguba sa pipila ka bahin sa maong gambalay.
Gawas sa tent, nag-apudapud sab ang Red Cross og libreng pagkaon gikan sa ilang mobile kitchen.
Sa pikas bahin, sumala sa initial assessment sa PDRRMO as of February 8, anaa sa P80.1 million ang natalang damyos sa nahitabong linog. Kapin 770,000 ka mga indibidwal o 229,647 ka mga pamilya ang nahimong apektado.
via || Bombo LJF
