DAVAO CITY – Plano karon sa ahensiya sa Department of Public works and Highways (DPWH) 11 nga dungagan pa ang mga quarantine holding facilities sa Davao International Airport (DIA) alang sa mga moabot nga pasahero ingon man magtukod sab ang ahensiya ug susama nga pasilidad sa Panacan ug Southern Philippines Medical Center (SPMC).
Sumala pa kang Dean Ortiz, tigpamaba sa DPWH-11 nga dungagan pa nila ug 400 bed capacity ang Davao airport kini pinaagi sa ipahimutang nga mga container vans ug paningkamutan nila nga mahuman kini sa bulan sa Disyembre ning kasamtangan nga tuig.
Nasayran sab sa opisyal nga anaa sa 40 bed capacity quarantine facility ang ilang ipahimutang sa Panacan ug 32 bed capacity usab ang sa Southern Philippines Medical Center (SPMC).
Tumong niini nga mas daghanan pa ang maakomodar ilabi na karon nga nagpabilin pa gihapon nga taas ang kaso sa Covid-19 sa siyudad.
