DAVAO CITY – Patay ang usa ka suspek sa pagpanghold-up human misukol sa otoridad pasado alas otso kagabii sa Bankerohan Public Market.
Naila ang napatay nga suspek nga si Jason Flores Gomez, 18 anyos, lalaki, ulitawo, usa ka out of school youth, residente sa Lower Madapo, Brgy 5-A, Bankerohan, ning dakbayan.
Ayha ang nahitabong insidente, mireklamo sa kapulian ang biktima sa robbery hold-up nga nailang si Louella Felicidad Binasbas, 26 anyos, residente sa Tacurong, Sultan Kudarat samtang naglakaw kini sa alley sa Bankerohan Public Market.
Gikanayong migamit sumala pa ang suspek ug wala matino nga klase sa armas atol sa iyang pagpanghold-up.
Dihang gisubay sa rouges gallery, positibo nga gitudlo sa biktima ang suspek nga una ng nasikop sa otoridad gumikan sa pagpangawat ug nalambigit sab sa kagubot.
Tungod niini naglusad ug joint follow operation ang San Pedro Police ug Sta. Ana PNP alang sa pagsikop sa suspek.
Dihang nasiplatan sa otoridad ang suspek sa Bankerohan Public Market, giduol kini sa kapulisan apan inay nga motahan mibunlot sumala pa kini sa iyang .38 caliber revolver nga maoy hinungdan nga napugos ang kapulisan sa pagpusil sa suspek isip depensa sa ilang kaugalingon.
Narekober gikan sa crime scene ang .38 caliber revolver nga walay serial number nga gi-undan sa lima ka mga buhing bala, tulo ka mga fired cartridge case sa .9mm pistol ug sling bag nga gi-undan sa pinaugang dahon sa marijuana.
Gidala pa sa balay tambalanan ang suspek apan nakabsan kini sa iyang kinabuhi subay sa deklarasyon ni Dr. Anthony Araneta pasado alas nuebe kagabii.
