DAVAO CITY – Gi-andam na karon sa lokal nga panggamhanan ang itunol nga hinabang alang sa mga nabiktima sa sunog kagahapong adlawa sa Bryco Purok 2 Bankerohan Riverside Barangay 5-A ning dakbayan kagahapon diin anaa sa 60 ka mga balay ang gilamoy sa kalayo.
Kahinumduman nga ang nahisgutan nga sunog mi-abot sa ikatulo nga alarma.
Daghanang mga residente karon ang nawad-an og panimalay ug kagamitan sanglit paspas ang pagkatag sa kalayo.
Sumala pa kang Senior Fire Officer 2 (SFO2) Ramil Gillado, BFP Davao chief sa intelligence and investigation section, nga padayon pa nila karon nga gipanubayan ang maong insidente aron nga masayran kung unsa ang tinubdan sa sunog.
Apan base sa inisyal nga imbestigasyon, posibleng nagsugod ang sunog sa nag-overheat nga ceiling fan.
Gitataw sab ni Gillado nga gibana-bananag miabot sa P630,000 ang damyos sa nahisgutan nga sunog.
Nasayran sa BFP nga sa kasamtangan, nakatala na matud pa sila og 26 ka mga sunog sa siyudad sulod lamang karong bulan sa Enero.
