DAVAO CITY – Ipagula sulod karung semanaha sa lokal nga panggamhanan ang mga pangalan sa high-ranking official nga napasakahan ug kasong administratibo.
Gikanayong mikabat sa 50 ka mga empleyado ang giimbestigahan sa lokal nga panggamhanan partikular na sa internal investigating committee.
Sagad sumala pa sa mga administrative cases mao ang tardiness ngadto na sa grabe nga kalapasan sama na lamang sa dili tukma nga paggamit sa mga public vehicles, ug daghanan pa.
Kahinumduman nga una ng gilagdaan ni Mayor Sara Duterte-Carpio ang Executive Order No. 06, Series of 2017, nga nagmugna ug internal investigating committee.
Pinasikad sa dokumento ang investigating committee langkuban ni City Legal Office Atty. Osmundo Villanueva, Jr., assistant city administrator Lawrence Bantiding, ug Human Resources head Erwin Alparaque.
Nag-unang tahas sa mga nahisgutan mao ang pag-imbestiga sa administrative cases ug isumite ang ilang findings niini ingon man pagpahigayon ug gikinahanglan nga proceedings, conferences, hearings, ug uban pa aron nga maaksiyonan ang mga reklamo batok sa mga hiwi nga mga empleyado.
Gikanayong ang mga prosecutors langkuban nila ni Atty. Enrique Bonocan, Marlisa Gallo, ug Janis Louis Esparcia nga susamang anaa sa City Legal Office.
Nasayran nga ang city administrator’s office adunay gahum nga hinganlan ang bag-ong special administrative prosecutor pinaagi sa usa ka memo.
Samtang ang EO magsilbi nga secretariat aron nga himuon ang clerical functions kalabot sa mga administrative complaint.
