Gikumpirma sa Israeli military nga ilang giguba ang usa ka underground infrastructure sa grupong Hezbollah sa usa ka baryo sa southern Lebanon, nga gitumong isip strategic tunnel nga giingong gigamit sa armas ug operasyon sa maong grupo.
Sumala pa sa joint statement ni Israeli Prime Minister Benjamin Netanyahu ug Defense Minister Israel Katz, giuna pa nila pagpahibalo sa Estados Unidos ang maong pag-atake sa wala pa kini ipatuman. Dugang pa niini, gipuntirya sa airstrike ang usa ka tunnel sa Majdal Zoun nga may gilay-on nga 200 metros o 656 ka tiil, diin giingong dunay gitago nga daghang armas ug launchers.
Kahinumduman, ang maong operasyon gihimo duha ka adlaw human sa kasabutan sa Israel ug Lebanon sa usa ka security arrangement nga gi-facilitate sa Estados Unidos nga tumong unta nga mopahupay sa tensyon sa border.Sa kasamtangan, giingon sa Hezbollah nga ang maong pag-atake usa ka klarong paglapas sa ceasefire ug ilang gibantayan ang tanang lihok sa Israel samtang andam silang depensahan ang ilang teritoryo ug mga sibilyan.
Dugang pa niini, gisalikway ni Hezbollah leader Naim Qassem ang security agreement ug giingon nga kini usa ka porma sa pagsurender sa Israel, samtang mipasalig nga magpadayon ang ilang armadong pakigbisog.
