Nakabsan sa kinabuhi ang usa sa mga helper sa forward truck human nga gipusil sa mga tulisan pasado alas 7:00 kagabii sa Km.70, Brgy. Tuburan, Mawab, Davao De Oro.
Subay sa report gikan sa kapulisan, ang giktima giila nga si Novem Albisa Vellesas nga residente sa New Bataan, Davao De Oro.
Subay sa inisyal nga imbistigasyon sa kapulisan, gikan sa lungsod sa Trento ang biktima kauban ang drayber ug laing kauban nga helper nga adunay karga nga tangke sa oxygen ug acetylene.
Dugang pa sa kapulisan, pag-abot sa mga biktima sa maong dapit kalit lamang sumala pa sila nga gibabagan sa nakamotorsiklo ug nagpabuto sa armas dayon mideklara sumala pa og tulis.
Wala sumala pa’y nahimo ang mga biktima, hinungdan nga napugos kini sa pagnaog sa ilahang gisakyan nga truck.
Apan gumikan sumala pa sa kahadlok sa mga biktima nag-iyahay sila sa pagdagan palayo sa maong dapit, hinungdan nga napusilan kini sa mga suspetsado tungod sumala pa sa kalagot niini.
Atol sa pagpamusil, napuruhan sa ulo ang biktima nga maoy hinungdan sa iyahang kamatayon. Human sumala pa sa pagpamusil, dali nga misibat ang mga suspetsado nga walay nadala nga kwarta.
Sa crime scene narekober ang tulo ka mga basyo sa bala sa caliber .45 nga pistola nga gigamit sa mga suspek .
Lakip usab sa narekober ang kwarta nga nagkantidad og ₱108,100 sulod sa truck. Sa pagkakaron, nagpadayon ang hot pusruit operation sa kapulisan batok sa mga suspetsado.
