DAVAO CITY – Gipasalig sa Barangay Kapitan sa Brgy. Tomas Monteverde Agdao nga si Robert Diaz nga padayon nila karon nga pahugtan ang pagpatuman ug health protocols bisan tuod nga hingpit na nga gitapos ang hard lockdown sa Purok 8 sa nahisgutan nga lugar human nga nakarekober na ang 69 ka mga residente nga una ng nagpositibo sa Covid-19.
Kahinumduman nga anaa na lamang sa 11 ang active cases sa lugar apan kinahanglan mopatuman pa gihapon ug hugtanon nga mga lakang ang lugar kini aron masiguro na dili na subling mahitabo sa ilang dapit ang lockdown.
Hinuon kalakip pa gihapon ang Barangay sa mga High Risk areas kini base sa ulahing classification nga gipagula sa lokal nga kagamhanan.
Una niini, nagpasalamat sab ni Brgy. Capt. Diaz sa mga residente sa nahisgutan nga sa gipakita niining kooperasyon atol sa lockdown hinungdan nga nagpugngan nila ang pagtakod-takod sa kagaw.
