Gihangyo sa Office of Public Counsel for Victims (OPCV) ang International Criminal Court (ICC) nga isalikway ang hangyo sa kampo ni kanhi Pangulong Rodrigo Duterte nga ipalugway ang pagdesisyon sa ilahang pagkontra sa hurisdiksyon sa korte kalabot sa mga gikaingong krimen nga nahitabo atol sa iyahang gipatuman nga war on drugs.
Sa dokumentong gipagawas niadtong Hulyo 24, 2025, gi-insister sa principal counsel sa mga biktima nga si Paolina Massidda nga walay igong basihanan ang hangyo sa kampo sa kanhing pangulo ug supak kini sa interes sa mga biktima.
Matod niya, ang mga argumento nga ilahang gipangayo dili man kini konektado sa isyu nga adunay kalabotan sa hurisdiksyon sa korte.
Gingalan pa sa OPCV nga “haka-haka” o speculative lamang ang ilahang hangyo, ug gibutyag usab nga ang mga biktima adunay katungod sa paspas ug klaro nga proseso sa balaod.
Dugang pa sa OPCV, andam na ang korte sa pagpagula og desisyon, ug ang bugtong legal nga opsyon sa kampo sa depensa mao ang pag-withdraw sa ilahang hagit nga hangtod karon wala pa niini gibuhat.
Samtang, sa laing dokumentong gisumite usab niadtong Hulyo 24, gibalikan sa abogado ni Duterte nga si Atty. Nicholas Kaufman ang ilahang hangyo nga dili ipadayon ang pagdungog sa pipila ka isyu (nga wala giisa sa publiko).
Gibutyag usab sa kampo sa kanhing pangulo nga wala sila’y ipresenta nga saksi o testimonya sa hearing ug dokumentaryong ebidensiya na lamang ang ilahang ipasa.
Sa pagkakaron wala pa gihapon nagpaguwa og desisyon ang ICC Pre-Trial Chamber I kabahin sa hangyo sa depensa ni Duterte nga magpahigayon og status conference aron hisgutan ang mga isyu nga adunay kalabotan sa nakatakda nga confirmation hearing karong Setyembre 2025.
