DAVAO CITY – Hangyo karon sa balo ni Corporal Michael Yadao nga si Glysa, 30 anyos, usa ka registered nurse nga mahatagan siya ug trabaho karon nga wala na ang iyang kapikas.
Kalakip sa nahimong hangyo ni Glysa atol sa pagduaw ni pangulong Rodrigo Duterte kagahapon sa hapon sa haya nila ni Yadao ug PFC Vernel Damondon, 24 anyos, duha ka bulan pa lamang nga nahimong sundalo sa Gym sa Eastern Mindanao Command sa Panacan ning dakbayan sa Davao.
Kalakip sa hangyo ni Glysa mao ang passes sa pamilya sa namatay nga sundalo gikan sa Luzon padulong sa Cagayan de Oro.
Ang magti-ayong Corporal Michael ug Glysa Yadao tua manimoyo sa Opol, Misamis Oriental.
Ang haya ni Michael ibalhin sa 3rd Infantry Battalion sa Calinan ning dakbayan gumikan kay bout sa mga kaubanan niini nga masud-ong ang patay’ng lawas sa ilang kaubanan sa dili pa kini ibiyahe padulong sa Opol karong adlaw nga Dominggo.
Gitunolan ug financial assistance ang pamilya sa duha ka mga sundalo.
Si Glysa ang midawat alang sa kang Corporal Yadao, samtang si Emily Damondon sa bang midawat alang sa kang PFC Damondon, diin ang dakbayan sa Davao ang labing una niya nga assignment.
Tinguha ni Ginang Emily Damondon nga madala balik sa ilang dapit sa Koronadal City, South Cotabato ang patay nga lawas ni PFC Vernel Damondon.
Nangamatay ang duha ka mga sundalo dihang gipabusikad niini ang gipanglubong nga mga landmine sa Lamanan, Calinan, niing milabay nga hapon atol sa gilusad nga operasyon sa 3rd IB Philippine Army sa paggukod sa mga NPA nga nanghasi sa nahisgutan nga dapit.
Kalakip sa giduaw ni Pangulong Duterte mao ang dese otso ka mga angol nga mga kaubanan sa nangamatay nga mga sundalo.
Matag usa ka mga sundalo nakadawat ug dies mil ka pesos nga cash assistance.
Human sa nahisgutan nga kalihukan diretso nga milupad si Pangulong Duterte padulong sa dakbayan sa Baguio alang sa anibersaryo sa Philippine Military Academy (PMA).
