DAVAO CITY – Muabot sa kapin 1,000 ka mga kaso sa Hand Foot and Mouth Disease (HFMD) ang natala sa Department of Health gikan sa mga probinsya sa Davao Region. Subay sa datos nga gipagawas sa buhatan, as of January 1 ngadto na sa Pebrero onse ning kasamtangan tuig, nakatala og 1,412 ka mga kaso gikan sa 166 ka mga barangay. Mas taas kini kon itandi sa milabay nga tuig nga anaa sa 711 ka kaso ang natala sa rehiyon. Sumala sa datos, labing-taas ang Davao De oro nga nakatala og 415 ka kaso sa HFMD; gisundan usab kini sa Davao Del Norte nga adunay 374 ka kaso ; 296 ka kaso ang natala sa Davao City ; 200 sa Davao Occidental ; 102 sa Davao Oriental ; samtang 25 lamang sa HFMD cases ang natala sa Davao Del Sur. Base usab sa datos, sagad sa HFMD natala gikan sa 0 ngadto sa 9 anyos ang panuigon. Diin 652 kon 46% ang mga kababayen-an ug 760 o 54% sa lalaki. Sumala ni Dr. Gerna Manatad, Assistant Regional Director sa DOH- XI, hingpit sila nakig-koordinar ngadto sa mga apektadong LGUs ug mga komunidad hain apektado sa HFMD, aron mamonitor nila kini. Gikanayon usab ni Dr. Manatad nga self-limiting lamang ang sakit ug walay natalang casualities gumikan puros Mild lamang ang natalang kaso sa maong balatian.
